Afdeling vir Gemeenskapsinteraksie

Rol van die Afdeling

Die rol van die Afdeling vir Gemeenskapsinteraksie is om die institusionele en operasionele been van die kernfunksie Gemeenskapsinteraksie te ondersteun, te fasiliteer en te bestuur. Die oorhoofse doel van die afdeling is vierledig, naamlik: Koördinering, Ondersteuning, Kapasiteitsbou en Kwaliteitsversekering.

Hierdie afdeling sal nie self by gemeenskapsaksies betrokke raak nie, maar vennootskappe met gemeenskappe inisieer en prosesse fasiliteer en ondersteun wat gemeenskapsinteraksie sal versterk.

Funksies van die Afdeling

Die Afdeling Gemeenskapsinteraksie vervul die volgende funksies ter ondersteuning van die kernfunksie binne die Universiteit:

•Koördinering van gemeenskapsaksies deur instansies binne die Universiteit deur middel van die gevormde strukture.
•Fasilitering van samewerking tussen bestaande gemeenskapsaksies in die soeke na waardetoevoeging en sinergie sowel as die vestiging van nuwe multidissiplinêre gemeenskapsprogramme.
•Inisiëring van nuwe projekte en programme in vennootskap met gemeenskappe.
•Netwerking met plaaslike, streeks-, provinsiale, nasionale en internasionele instansies met die oog op kundigheidsverbreding en potensiële vennootskappe.
•Die ontwikkeling van meetinstrumente vir doeltreffende monitering en evaluering van programme en projekte.
•Die versterking van die korporatiewe beeld van die Universiteit deur blootstellingsgeleenthede op plaaslike, streeks-, provinsiale, nasionale en internasionale vlak te benut en te skep.
•Die ontwikkeling van strategieë om doeltreffend en volhoubaar inkomste te genereer deur middel van projekte en programme relevant tot die behoefte van die gemeenskappe en in ooreenstemming met prioriteite wat van nasionale belang is.
•Die skep van ’n bemagtigende omgewing vir die nuwe paradigma in gemeenskapsinteraksie wat sal insluit die ontwikkeling van diensleermodules, identifisering en mobilisering van leerlokaliteite en die ontwikkeling van ondersteuningsmeganismes.
•Die mobilisering van bestaande projekte om as potensiële leerlokaliteite aangewend te word. •Die ontwikkeling van relevante bestuursinligting en die vestiging en instandhouding van ’n databasis om bostaande funksies te ondersteun.
•Advies aan die Viserektor (Gemeenskapsinteraksie en Personeel) t.o.v. beleidsoperasionalisering, -hersiening en -herformulering op ‘n deurlopende basis.